ბერძნული სამედიცინო ფონდი „ჰიპოკრატე“ – 28 წელი პაციენტების სამსახურში

გვესაუბრება ბერძნული სამედიცინო ფონდის „ჰიპოკრატეს“ დირექტორის მოადგილე და ხარისხის მენეჯერი ალინა პაპანიდუ.

– ქალბატონო ალინა, პირველ რიგში, გვიამბეთ, როგორ შეიქმნა ბერძნული სამედიცინო ფონდი „ჰიპოკრატე“ და რა იყო მისი დაარსების მთავარი მიზანი?

– ბერძნული სამედიცინო ფონდი „ჰიპოკრატე“ 1998 წელს შეიქმნა იმ მიზნით, რომ საქართველოს მოსახლეობისთვის ხელმისაწვდომი გამხდარიყო თანამედროვე, ხარისხიანი და საერთაშორისო სტანდარტებზე დაფუძნებული სამედიცინო მომსახურება. ფონდის შექმნის იდეა ეფუძნებოდა ჰუმანიზმის, თანადგომისა და პროფესიონალიზმის პრინციპებს, რომლებიც თავად მედიცინის ფუძემდებლის ” ჰიპოკრატეს”სახელთან არის დაკავშირებული.

იმ პერიოდში საქართველოს ჯანდაცვის სისტემა განვითარების რთულ ეტაპზე იმყოფებოდა. მოსახლეობას სჭირდებოდა ისეთი სამედიცინო დაწესებულება, სადაც შეძლებდა კვალიფიციური ექიმებისგან პროფესიონალური დახმარების მიღებას, თანამედროვე დიაგნოსტიკის ჩატარებას და მკურნალობის სრულყოფილ პროცესში მონაწილეობას.

ფონდის საქმიანობის დაწყებიდანვე მთავარი პრიორიტეტი იყო არა მხოლოდ დაავადებების მკურნალობა, არამედ ადამიანის ჯანმრთელობაზე ზრუნვა, დაავადებების პრევენცია და პაციენტისთვის უსაფრთხო, კომფორტული გარემოს შექმნა.

– თითქმის სამი ათეული წელია „ჰიპოკრატე“ საქართველოს ჯანდაცვის სფეროს ემსახურება. რა დატვირთვა აქვს დღეს ფონდს?

– დღეს ბერძნული სამედიცინო ფონდი „ჰიპოკრატე“ მრავალპროფილური სამედიცინო დაწესებულებაა, რომელიც ყოველდღიურად უამრავ პაციენტს ემსახურება. წლების განმავლობაში დაგროვილი გამოცდილება, მაღალკვალიფიციური ექიმები და თანამედროვე სამედიცინო ტექნოლოგიები საშუალებას გვაძლევს, მოსახლეობას მაღალი ხარისხის სამედიცინო მომსახურება შევთავაზოთ.

ჩვენთვის მნიშვნელოვანია, რომ პაციენტმა ერთ სივრცეში მიიღოს როგორც კონსულტაცია, ასევე დიაგნოსტიკა, ლაბორატორიული კვლევები და მკურნალობის ინდივიდუალურად დაგეგმილი სერვისები.

დღეს ჩვენი საქმიანობა მხოლოდ სამედიცინო მომსახურებით არ შემოიფარგლება. განსაკუთრებულ ყურადღებას ვუთმობთ ხარისხის მართვას, საერთაშორისო სტანდარტების დანერგვას, სამედიცინო პერსონალის უწყვეტ პროფესიულ განვითარებას და პაციენტების უსაფრთხოების უზრუნველყოფას.

– საქართველოს არაერთი მძიმე პერიოდი აქვს გადატანილი. როგორ ახერხებდა ფონდი საქმიანობის გაგრძელებას ასეთ დროს?

– მართლაც, ჩვენი ქვეყნის უახლესი ისტორია სავსეა გამოწვევებით. ეკონომიკური სირთულეები, სხვადასხვა კრიზისი და განსაკუთრებით პანდემიის პერიოდი მთელი ჯანდაცვის სისტემისთვის სერიოზული გამოცდა იყო.

ამ რთულ წლებში „ჰიპოკრატეს“ გუნდი ყოველდღიურად იდგა პაციენტების გვერდით. ექიმები, ექთნები და ადმინისტრაციული პერსონალი განსაკუთრებული პასუხისმგებლობით აგრძელებდნენ საქმიანობას. ბევრი თანამშრომელი პრაქტიკულად უწყვეტ რეჟიმში მუშაობდა, რათა არც ერთ პაციენტს არ შეზღუდვოდა სამედიცინო დახმარების მიღების შესაძლებლობა.

ასეთ პერიოდში კიდევ უფრო ნათლად გამოჩნდა, რომ მედიცინა მხოლოდ პროფესია არ არის – ეს არის ადამიანებისადმი მსახურება, პასუხისმგებლობა და ჰუმანიზმი.

ფონდის ჰუმანიტარული მისიის ფარგლებში წამოწყებული კიდევ ერთი მნიშვნელოვანი კომპონენტი იყო აშშ-ის სახელმწიფო დეპარტამენტის მიერ დაფინანსებული მცირე რეკონსტრუქციის პროექტები (Small Reconstruction Project), რომლებიც ხელს უწყობდა საქართველოს სხვადასხვა სამედიცინო და სოციალურ დაწესებულებაში ჯანდაცვისა და საყოფაცხოვრებო პირობების გაუმჯობესებას.

აღნიშნული კომპონენტის ფარგლებში განხორციელდა 15 სხვადასხვა პროექტი (კოჯრის ბავშვთა სახლი, თელავის ბავშვთა სახლი, ძეგვის თავშესაფარი, საბავშვო ბაღები გორში, მცხეთაში, ქსოვრის შიდა დიდში, სოფელ ირაგაში, ძალისში, ზერტში, ხიდისთავსა და რუისპირში არსებული ამბულატორიები), რომლის ფარგლებშიც ბერძნულმა სამედიცინო ფონდმა „ჰიპოკრატემ“ სრულად გაარემონტა და აღჭურვა აღნიშნული ობიექტები.

ვფიქრობ, სწორედ ამ ღირებულებებმა მოგვცა შესაძლებლობა, ყველა გამოწვევა ღირსეულად გადაგველახა.

– რა სამედიცინო მომსახურებას სთავაზობს დღეს „ჰიპოკრატე“ მოსახლეობას?

– ჩვენი დაწესებულება მრავალპროფილურ სამედიცინო მომსახურებას ახორციელებს და საყოველთაო ჯანდაცვის პროგრამის პროვაიდერი კლინიკა/ამბულატორიაა.

პაციენტებს ვთავაზობთ სხვადასხვა სპეციალისტის კონსულტაციებს, თანამედროვე ლაბორატორიულ კვლევებს, ინსტრუმენტულ დიაგნოსტიკას, ულტრაბგერით გამოკვლევებს, დარტყმით-ტალღოვან პროცედურებს, დიდი კანქვეშა ვენების ინტრავასკულარულ რადიოაბლაციას, გინეკოლოგიურ პროცედურებს, მათ შორის ჰისტეროსკოპიულ საშვილოსნოს გამოფხეკვას, განახლებულია ჰოლტერის მონიტორინგის სერვისი, ტარდება თვალის ოპერაციები (კატარაქტა), ფუნქციური კვლევები, პრევენციული პროგრამები, სამკურნალო და სარეაბილიტაციო მომსახურება.

მთავარი პრინციპია, რომ თითოეულ ადამიანს ინდივიდუალური მიდგომით მოვემსახუროთ. დაავადების სწორად დიაგნოსტიკა და დროულად დაწყებული მკურნალობა წარმატებული შედეგის საფუძველია.

ჩვენ მუდმივად ვანახლებთ სამედიცინო ტექნოლოგიებს, რათა პაციენტებმა მიიღონ იმ ხარისხის მომსახურება, რომელიც სრულად შეესაბამება თანამედროვე მედიცინის მოთხოვნებს.

– თქვენ ხარისხის მენეჯერიც ბრძანდებით. რას ნიშნავს თქვენთვის ხარისხიანი სამედიცინო მომსახურება?

– დიახ, 2024 წლის 31 ოქტომბერს გავხდით ISO 9001-ის სერტიფიკატის მფლობელები და კლინიკაში დავნერგეთ ხარისხის მენეჯმენტის სისტემა.

ხარისხი არ არის მხოლოდ თანამედროვე აპარატურა ან კვალიფიციური ექიმი. ხარისხი იწყება იმ წუთიდან, როდესაც პაციენტი პირველად შემოდის კლინიკაში და სრულდება მაშინ, როდესაც ის კმაყოფილი ტოვებს სამედიცინო დაწესებულებას.

ეს გულისხმობს უსაფრთხო გარემოს, პროფესიონალურ დიაგნოსტიკას, ეფექტიან მკურნალობას, ეთიკურ დამოკიდებულებას, პაციენტის უფლებების დაცვას და მომსახურების მუდმივ გაუმჯობესებას.

ჩვენ ყოველდღიურად ვმუშაობთ იმისთვის, რომ თითოეული პროცესი იყოს მაქსიმალურად გამართული, გამჭვირვალე და საერთაშორისო სტანდარტებთან შესაბამისობაში.

– რა გამოარჩევს ბერძნულ სამედიცინო ფონდ „ჰიპოკრატეს“ სხვა სამედიცინო დაწესებულებებისგან?

– ვფიქრობ, ჩვენი მთავარი უპირატესობა ადამიანური დამოკიდებულებაა. პაციენტისთვის მნიშვნელოვანია არა მხოლოდ პროფესიონალიზმი, არამედ ისიც, რომ მას მოუსმინონ, აუხსნან მისი ჯანმრთელობის მდგომარეობა და პროცესში პარტნიორად იგრძნოს თავი.

ამასთან ერთად, ჩვენი გუნდი მუდმივად ზრუნავს პროფესიულ განვითარებაზე, თანამედროვე სამედიცინო მეთოდების დანერგვასა და მომსახურების ხარისხის გაუმჯობესებაზე.

წლების განმავლობაში საზოგადოების ნდობა სწორედ ამ ღირებულებებზე ავაშენეთ.

– რა გეგმები აქვს ფონდს უახლოეს წლებში?

– განვითარების პროცესი არასოდეს ჩერდება. ჩვენი მთავარი მიზანია კიდევ უფრო გავაფართოოთ სამედიცინო მომსახურების სპექტრი, შევიძინოთ ახალი თაობის სამედიცინო აპარატურა, დავნერგოთ თანამედროვე დიაგნოსტიკური და სამკურნალო ტექნოლოგიები და კიდევ უფრო გავაძლიეროთ თანამშრომლობა საერთაშორისო სამედიცინო ორგანიზაციებთან.

ასევე ვგეგმავთ ახალი მიმართულებების განვითარებას, ექიმების კვალიფიკაციის მუდმივ ამაღლებას და ისეთი გარემოს შექმნას, სადაც პაციენტი მიიღებს არა მხოლოდ მაღალი ხარისხის სამედიცინო დახმარებას, არამედ ადამიანურ დამოკიდებულებასაც.

ჩვენი მიზანია, „ჰიპოკრატე“ მომავალშიც დარჩეს ერთ-ერთ სანდო სამედიცინო ცენტრად საქართველოში.

– და ბოლოს, რას ეტყოდით ჩვენს მკითხველს?

– პირველ რიგში, ყველას ვუსურვებ ჯანმრთელობას. მინდა მოვუწოდო საზოგადოებას, მეტი ყურადღება დაუთმოს ჯანმრთელობის პრევენციას. რეგულარული პროფილაქტიკური გამოკვლევები ბევრ დაავადებას ადრეულ ეტაპზე ავლენს და მნიშვნელოვნად ზრდის წარმატებული მკურნალობის შესაძლებლობას.

ბერძნული სამედიცინო ფონდი „ჰიპოკრატე“ უკვე 1998 წლიდან ერთგულად ემსახურება საქართველოს მოსახლეობას და მომავალშიც გააგრძელებს საქმიანობას პროფესიონალიზმის, პასუხისმგებლობისა და ჰუმანურობის პრინციპებით.

ჩვენთვის ყველაზე დიდი ჯილდო პაციენტის ნდობა და მისი ჯანმრთელობაა.