The Times: შესაძლოა, ტრამპმა რუსეთთან ევროპის ზურგს უკან გარიგება დადოს
ევროპაში იზრდება შეშფოთება, რომ აშშ-მ შესაძლოა მიატოვოს თავისი ნატოს მოკავშირეები და რუსეთთან შეთანხმებას მიაღწიოს, იტყობინება The Times ევროპელ მაღალჩინოსნებზე დაყრდნობით.
ჩინოვნიკების თქმით, ევროპა მზად უნდა იყოს მარტო საბრძოლველად „ყველაზე ცუდი სცენარის“ შემთხვევაში. ევროპული ქვეყნები შიშობენ, რომ აშშ-ის პრეზიდენტი დონალდ ტრამპი შესაძლოა უარს იტყვის ნატოს წევრი ქვეყნების დაცვაზე, თუ რუსეთი თავს დაესხმება მათ ტერიტორიას.
- „ამერიკის გასვლა ევროპული უსაფრთხოების საქმეებიდან აღარ არის ყველაზე ცუდი სცენარი. ყველაზე ცუდი სცენარი არის ამერიკის გასვლა ევროპული უსაფრთხოებისგან და ჩვენს წინააღმდეგ შემობრუნება… ტრამპმა შეიძლება სცადოს რუსებთან დიდი გარიგების დადება ჩვენს თავზე – რაც ხუთი ან ექვსი წლის წინ შეუძლებლად ჩანდა“, – განუცხადა ერთ-ერთმა ევროპელმა ოფიციალურმა პირმა ჟურნალისტებს.
ბრიტანელმა სამხედრო წყარომ ასევე გამოთქვა შეშფოთება, რომ აშშ-მ შეიძლება უარი თქვას ნატოს აღმოსავლეთ ფლანგის დაცვაზე თავდასხმის შემთხვევაში. გამოცემამ ხაზგასმით აღნიშნა, რომ ეს შეშფოთება გამოითქვა იმავე დღეს, როდესაც აშშ განიხილავდა უკრაინისთვის განკუთვნილი ძირითადი რესურსების ახლო აღმოსავლეთში გადამისამართებას.
გარდა ამისა, ტრამპი ბოლო დროს სულ უფრო ხშირად აკრიტიკებს ნატოს მოკავშირეებს, ამტკიცებს, რომ ისინი არ ეხმარებიან შეერთებულ შტატებს ირანის წინააღმდეგ ომში. მან ადრე მიანიშნა, რომ საპასუხოდ, შეერთებული შტატები შესაძლოა „არ იყოს ადგილზე“ მოკავშირეებზე თავდასხმის შემთხვევაში.
- „ჩვენ იქ ვართ, რათა დავიცვათ ევროპა რუსეთისგან. თეორიულად, ეს ჩვენ არ გვეხება; ჩვენ გვაქვს დიდი, ფართო, ლამაზი ოკეანე. ჩვენ იქ ვართ, რათა დავიცვათ ნატო… რათა დავიცვათ ისინი რუსეთისგან… მაგრამ ისინი იქ არ არიან, რომ დაგვიცვან. ამას აზრი არ აქვს“, – თქვა ტრამპმა.
ტრამპმა ნატოს ქვეყნები ირანის გამო გააკრიტიკა.
მანამდე, აშშ-ის პრეზიდენტმა დონალდ ტრამპმა განაცხადა, რომ ნატოს მოკავშირეებმა აბსოლუტურად არაფერი გააკეთეს ვაშინგტონის დასახმარებლად ირანთან დაკავშირებით. მან თქვა, რომ აშშ ამას არასოდეს დაივიწყებს.
მოგვიანებით, ნატოს გენერალურმა მდივანმა მარკ რუტემ მტკიცე მხარდაჭერა გამოუცხადა აშშ-ის სამხედრო ქმედებებს ირანის წინააღმდეგ. მან მოუწოდა ნატოს ქვეყნებს, გაერთიანდნენ ტრამპის მხარდასაჭერად.